تعالوا نعرف مع بعض فيلم Eternal Sunshine of the Spotless Mind

AF

هو تجربة نفسية وفلسفية عن العلاقات، والذكريات، والمشاعر اللي بنحاول ننسى بس مش بنقدر.

الفيلم بيحكي عن جويل (جيم كاري) وكليمنتين (كيت وينسلت)، اللي كانوا في علاقة عاطفية قوية بس مع الوقت بقت مليانة مشاكل وصراعات، لحد ما كليمنتين قررت تمسح كل ذكرياتها معاه حرفيًا عن طريق عيادة متخصصة في محو الذكريات. لما جويل يكتشف الموضوع، بينهار وبيقرر يعمل نفس العملية عشان ينساها، لكنه وهو نايم أثناء العملية بيبدأ يراجع ذكرياته معاها، ومن كتر ما بيحس بالسعادة في الذكريات القديمة، بيحاول يقاوم ويمسك في ذكرياته قبل ما تتشال للأبد.

ليه الفيلم ده عبقري ومميز؟

الفكرة إنك تمسح حد من حياتك حرفيًا عشان تقدر تتخطى الوجع، لكن الفيلم بيسأل: هل فعلاً الحل في إننا ننسى؟ ولا لازم نتعلم ونواجه مشاعرنا؟

و طريقة السرد عجيبة  .. القصة مش بتمشي بالترتيب العادي، بتتنقل بين ذكريات جويل ومشاعره وهو نايم في وسط العملية، فالمشاهد نفسه بيحس إنه عايش جوه عقله.
كل ما الذاكرة بتبدأ تختفي، الصورة بتبقى ضبابية والمكان بيبدأ ينهار، وكأنها فعلاً بتتمسح قدامك، وده بيخليك تحس بالحالة النفسية بتاعة جويل.

المشاعر الحقيقية والتمثيل الطبيعي جداً .. جيم كاري قدم واحد من أفضل أدواره، بعيد عن الكوميديا المعتادة، وخلى جويل شخصية هشة، حزينة، ضعيفة، لكن حقيقية جداً. و كيت وينسلت قدمت دور كليمنتين الغريبة والعفوية، اللي شخصيتها عكس جويل تمامًا، لكنها في نفس الوقت بتكمله.

الموسيقى حالمة وحزينة، بتحسسك إنك عايش جوه ذكريات شخص حقيقي. و الألوان والإضاءة بتعكس المشاعر، لما الذكريات سعيدة الإضاءة دافئة ومريحة، ولما الذكريات بتمحى الدنيا بتضلم والألوان بتختفي.

الفيلم بيسأل: هل الحب بيستاهل إننا نستحمل الألم اللي بييجي بعده؟

و في الآخر، حتى لو مسحت الذكريات، القلب والعقل بيلاقوا طريق لبعض تاني، وده اللي حصل مع جويل وكليمنتين لما اتقابلوا تاني بالصدفة، وحسوا بانجذاب لبعض حتى وهما مش فاكرين علاقتهم القديمة.

ليه الفيلم ده عبقري ومُفضل عند ناس كتير؟

لأنه بيوصف العلاقات العاطفية بشكل حقيقي جداً، مش بيحاول يصورها إنها مثالية، بالعكس بيورينا الجانب الصعب فيها. و بيمسك في فكرة الذكريات والمشاعر الإنسانية، وإزاي مهما حاولت تهرب من حاجة بتحبها، قلبك ممكن يفضل يدور عليها.

الفيلم مش مجرد قصة حب، ده رحلة جوه عقل إنسان مجروح، بيسأل نفسه طول الوقت: هل المفروض أنسى؟ ولا المفروض أتعلم من اللي حصل

 Eternal Sunshine of the Spotless Mind
 بيخليك طول ما انت بتتفرج تفكر في كل ذكرياتك اللي بتتمنى تنساها، لكن عارف إنها جزء منك.

اكتبولنا رأيكم في الكومنتات 
وماتنسوش الايك والشير 

بقلم ايمان سمير